Comezan esta tarde as Noites do Carme dentro das festas das Pontes
Como se vén facendo desde varias edicións pasadas, antes de dar oficialmente comezo ás festas, haberá unha previa coas Noites do Carme, desde o venres 11 ata o xoves 17, na que haberá unha actuación por xornada. Debutarán nesta xornada festiva a Escola Municipal de Baile Moderno, cunha actuación ás 21.00 horas na praza do Carme, que deixará un bo sabor de boca para a xeira de actuacións que lle van suceder.
O sábado 12 ás 20.00 horas, convidarase aos veciños das Pontes a un Certame de Bandas na praza de América, precedido dun pasarrúas ás 19.30 horas, coas bandas Isabel II de Touro, a Banda de Música de Arca e a Banda cultural e Recreativa das Pontes.
Logo dun parón, o luns 14 retomarase a programa co III Festival de Acordeóns Vila das Pontes e o martes 15 é a quenda do II Festival de Música de Ultramar, no que participarán a Rondalla Vila das Pontes e a agrupación coruñesa Amizades.
Como non pode ser doutra maneira, haberá espazo para a música tradicional coas actuacións da Banda de Gaitas da Escola Municipal de Música Tradicional e o grupo de baile da Escola Municipal de Gaile Galego, que farán unha actuación conxunta; e na última xornada das Noites do Carme o protagonismo será para as agrupacións tradicionais Canavella, Os Trevillas e No Cómbaro.