Concentración de emerxencia ante Endesa para que non desmantele as instalacións
![106243688_1601323716684908_2883597680576283197_o](https://terrachaxa.com/wp-content/uploads/2020/06/106243688_1601323716684908_2883597680576283197_o.jpg)
Traballadores da central de Endesa nas Pontes, transportistas e sindicalistas realizaron onte unha protesta de urxencia diante da térmica para impedir o desmantelamento de parte da obra de adaptación dos grupos 3 e 4 que se está a realizar. A mobilización convocouse nada máis coñecerse as intencións da eléctrica e levou a que un piquete se concentrara para bloquear os accesos ás instalacións até que a eléctrica recuou nas súas pretensións.
A medida de presión, explica Alberte Amado, da Executiva da CIG-Industria, obrigou á dirección da central térmica a suspender a desmontaxe de parte da desulfuradora (recentemente posta en marcha para adaptarse á normativa de emisións industriais) e a reafirmar a garantía inicial de non desmantelar os grupos 3 e 4 até coñecer os resultados das probas con combustíbeis alternativos, aínda no caso de que estes grupos non se usen para isto.
Este compromiso de manter a actividade fora asumido pola empresa na reunión co Ministerio celebrada esta mesma semana, polo que, para Amado, esta actuación evidencia "que a produción de enerxía con biocarburantes non é a aposta de Endesa ou mesmo a intención de limitar a capacidade operativa, pois sen estas pezas non poderán producir máis que dous dos catro grupos que ten a central".
Diante disto, a CIG demanda dos Gobernos español e galego a avanzar nunha transición enerxética xusta, concretando xa proxectos e alternativas que doten de futuro industrial á comarca e esixindo da empresa compromisos e garantías de emprego.
Durante a concentración, a dirección de Endesa confirmou que paralizaban os traballos de desmonte ata a obtención dos resultados das probas con biocombustibles para comezarán en xullo.
Por esta razón decidiron desconvocar a concentración.
![106030787_1601323766684903_8763071423160371616_n](https://terrachaxa.com/wp-content/uploads/thumbs/2020/06/106030787_1601323766684903_8763071423160371616_n-200x228.jpg)