Continúan as obras de mellora de accesos a vivendas en dúas parroquias de Abadín
O Concello de Abadín continúa co plan de mellora dos accesos a vivendas en distintos puntos do municipio, "coa finalidade de facilitar o día a día da veciñanza e garantir unhas condicións de mobilidade máis seguras e cómodas", din desde o Goberno local.
A empresa adxudicataria, Construcciones Cholo, S.L., con sede en Vilalba, está a executar estes traballos que abranguen actuacións en varias parroquias: na zona de Os Ares, en Romariz, así como en Lama Grande – O Cordal e no Calvo, ambas na parroquia de Labrada.
As intervencións céntranse principalmente na mellora e acondicionamento dos camiños de acceso ás vivendas, co arranxo das superficies, a mellora do firme e o incremento da seguridade, evitando así problemas de circulación en épocas de chuvia e favorecendo unha comunicación máis fluída entre as casas e as vías principais.
Dende o Concello salientan que este tipo de actuacións responden ás demandas veciñais e forman parte dun plan máis amplo de mantemento e mellora das infraestruturas rurais, fundamental nun territorio con tanta dispersión xeográfica como Abadín. Estas obras permiten que a poboación residente no rural conte con mellores servizos e axudan tamén a fixar veciñanza, ao facer máis atractiva e cómoda a vida nas parroquias.