Continúan as reunións informativas nas parroquias de Vilalba sobre a recollida de lixo
Esta semana proseguirán as reunións informativas organizadas polo Concello de Vilalba nas parroquias do municipio co obxectivo de informar á veciñanza e coordinar as melloras relacionadas co novo contrato de xestión do lixo. Estas sesións buscan resolver dúbidas, recoller suxestións e abordar aspectos fundamentais para garantir un mellor servizo.
Entre os temas a tratar nas reunións inclúense a optimización da frecuencia de recollida do lixo, a renovación dos colectores existentes e a instalación de novas illas de reciclaxe. Ademais, prestarase especial atención ás incidencias actuais que os veciños e veciñas poidan estar a experimentar, co compromiso de buscar solucións eficaces que melloren o día a día da comunidade.
O calendario de encontros para a próxima semana comezará o luns 3 de marzo, con reunións programadas en Mourence ás 20:00 horas na casa escola. O venres 7 estarán en Insua, á mesma hora.
Xa o día 10, luns, haberá dúas reunións, a primeira en Boizán, ás 20.00. horas e en Rioaveso, ás 21.00.
Na parroquia de Xoibán, na que non se dispón de local social, o goberno local está estudando a fórmula máis convinte no referido á data e ao lugar, do que se agarda poder dar máis información na maior brevidade.