Convocada unha nova edición do concurso literario 'Tes un conto' de Guitiriz
O Concello de Guitiriz, a través da súa biblioteca municipal, convoca a sexta edición da iniciativa literaria “Tes un conto…”, unha proposta que busca fomentar a creatividade e o uso da lingua galega entre a veciñanza coincidindo coa celebración do Mes do Libro.
A actividade convida ás persoas participantes a crear un texto —en verso ou prosa— no que deberán incluír unha serie de palabras propostas: “forno, rebelde, memoria, liberdade, Penélope, epístola, procurar, a partir de”. Esta condición pretende estimular a imaxinación e ofrecer un punto de partida común para todas as creacións.
A convocatoria enmárcase nas celebracións do Día do Libro Infantil e Xuvenil (2 de abril) e do Día do Libro (23 de abril), reforzando o compromiso co fomento da lectura e da escritura.
Os textos poderán enviarse por correo electrónico ou entregarse na biblioteca municipal, así como por correo postal. O prazo de presentación permanecerá aberto ata o 30 de abril.
Desde o Concello anímase á cidadanía a participar nesta iniciativa cultural: “é unha oportunidade para deixar voar a imaxinación e compartir historias propias en galego”.