Convocan a VII edición do premio de poesía Torre de Caldaloba
![premio-poesia-torre-de-caldaloba](https://terrachaxa.com/wp-content/uploads/2024/08/premio-poesia-torre-de-caldaloba.jpg)
O Concello de Cospeito e a Asociación Recreativa Cultural San Martiño de Pino, en colaboración con Culturalia GZ convocan a VII Certame de Poesía Torre de Caldaloba.
Esta iniciativa está deseñada co fin de poñer en valor este monumento histórico, promover a súa conservación e fomentar a creatividade e estimular a creación poética.
Poderán concorrer ao certame todos os autores que o desexen, calquera que sexa a súa finalidade, sempre que presenten as súas obras en lingua galega.
A organización deste certame establece unha soa categoría, para maiores de 16 anos e o gañador recibirá 1.500 euros de premio e a publicación da obra, e o segundo premio levará un accésit e a publicación da obra.
As bases contemplan un límite de entre 300 e 600 versos con tamaño de letra 12 puntos e arial. Para todos os interesados en presentar propostas, o prazo estará aberto ata o 20 de outubro.
Os requisitos para valorar as obras serán que estean en galego e escritas a ordenador e que sexan orixinais mentres que a temática é totalmente libre.
A entrega pode facerse por correo ordinario, no Concello de Cospeito sito en avenida Terra Chá n°29, Feira do Monte, 27377, Cospeito, Lugo; ou por sede electrónica.
O fallo será dado a coñecer con data 15 de novembro de 2024 a través dos medios de difusión e comunicado ás persoas gañadoras, entregando os premios nun acto convocado a tal fin con data 23 de novembro deste ano.
Destacan nas bases o feito de que non poderán presentarse os gañadores das últimas dúas citas.