Convocan en Pino un obradoiro de punto para crear unha bufanda
O Local Social da Escola de Pino acollerá o vindeiro sábado 24 de xaneiro o obradoiro Crea a túa bufanda, unha actividade formativa que se desenvolverá entre as 16.00 e as 18.00 horas. A proposta, de carácter práctico, permitirá ás persoas participantes iniciarse ou afondar nas técnicas básicas para a elaboración dunha bufanda artesanal.
O taller será impartido por María Jesús e está dirixido a público de todas as idades con interese nas manualidades e no traballo téxtil. A organización indica que cada participante deberá traer os seus propios materiais para poder realizar a actividade.
A inscrición será gratuíta para as persoas socias, mentres que as non socias deberán aboar unha cota de 15 euros. A iniciativa enmárcase dentro das actividades promovidas pola Asociación Recreativa e Cultural de San Martiño de Pino, co obxectivo de fomentar a participación veciñal e a aprendizaxe de habilidades creativas no ámbito comunitario.