Cruz Vermella organiza en Vilalba o martes un obradoiro sobre o uso das novas tecnoloxías
A praza da Constitución de Vilalba acollerá o vindeiro martes, 8 de xullo, uns obradoiros gratuítos sobre novas tecnoloxías e Internet organizados pola Cruz Vermella Española.
A actividade desenvolverase de 10:00 a 14:00 horas sen necesidade de inscrición previa, estando aberta a todas as persoas que se acheguen e desexen participar.
No programa ofrecerase información sobre a realidade virtual e a intelixencia artificial, formación en seguridade na rede para detectar posibles fraudes, así como instrucións prácticas sobre as utilidades da Internet, incluíndo o emprego da banca dixital e a realización de compras en liña.
Esta iniciativa busca facilitar á cidadanía o acceso á tecnoloxía e promover un uso seguro e responsable das ferramentas dixitais no día a día.