Debut do trompetista Alfredo Manzino no concerto de Semana Santa da Banda Municipal de Ribadeo
No concerto de Semana Santa da Banda Municipal de Música de Ribadeo, celebrado onte na igrexa parroquial de Santa María do Campo, debutou o trompetista Alfredo Manzino e estrearon seis obras.
Antes de empezar a actuación o director da Banda, David Ballester Martínez, agradeceu a colaboración da Parroquia para ofrecer o concerto na igrexa, anunciou o debut de Alfredo Manzino e comentou que ían tocar seis obras por primeira vez. A continuación a presidenta da asociación Amadores da Música, Elisa Álvarez Amor, colocoulle a gravata e a insignia da Banda ribadense ao músico debutante, o trompetista Alfredo Manzino, veciño de Castropol.
No concerto a Banda de Ribadeo interpretou por primeira vez Cristo del Amor, de Francisco Javier Moreno; Callejuela de la O, de Paco Lola e Martín Salas; Puerta del Cielo, de Francisco Javier Criado; A compás la cera llora, de J. Manuel Velázquez Ruiz; Altare Dei, de Ricardo Dorado; e Concha, de Victor M. Ferrer. Tamén tocaron The Young María, de Charles Gounod con arranxos de Ted Huggens, e remataron interpretando outra vez a peza Puerta del Cielo.
A próxima actuación da Banda Municipal de Ribadeo será con motivo do concerto das Letras Galegas, que está programado para o 18 de maio, sábado, ás 20:30 horas no Teatro ribadense.