Infraestructuras

O alcalde, Darío Cabaneiro, explicou que neste tramo da estrada existe “unha situación bastante caótica”, xa que o pavimento presenta un estado moi deteriorado

O deputado do PP no Congreso, Francisco Conde, e a deputada autonómica, Nicole Grueira, mantiveron unha reunión co alcalde da Pastoriza, Darío Cabaneiro, co tenente de alcalde, Marcos García Lombardero, e con representantes da Asociación de Veciños de Fonmiñá para coñecer de primeira man a situación da estrada N-640 ao seu paso por este municipio e trasladar ao Goberno central as demandas do Concello e da veciñanza.

Durante o encontro analizouse a problemática existente no entorno do quilómetro 60 desta vía, un punto no que os veciños veñen advertindo desde hai tempo dos riscos que supón o estado do firme e das carencias en materia de seguridade e iluminación.

O alcalde de Pastoriza, Darío Cabaneiro, explicou que neste tramo da estrada existe “unha situación bastante caótica”, xa que o pavimento presenta un estado moi deteriorado e obriga en ocasións aos vehículos a invadir o carril contrario para esquivar as fochancas, incrementando o risco de accidentes.

Cabaneiro lembrou ademais que o Ministerio de Transportes e Mobilidade Sostible si realizou actuacións noutro tramo da mesma estrada no concello de Meira, mentres que o tramo correspondente a Pastoriza quedou sen arranxar. “Arranxouse totalmente a estrada desde o lado de Meira e deixouse este tramo, o que corresponde a Pastoriza, sen actuar, cun pavimento bastante preocupante”, sinalou, ao tempo que reclamou ao propio Ministerio de Transportes que “tome nota desta situación e poña remedio canto antes”.

O rexedor tamén advertiu de que neste punto xa se produciron accidentes con vítimas, polo que considera prioritario actuar para mellorar o estado do firme e reforzar a seguridade viaria, así como instalar iluminación e habilitar un carril de saída cara ao barrio de Paraxes, que actualmente non existe.

Pola súa banda, o presidente da Asociación de Veciños de Fonmiñá, José Manuel “Lito” Rodríguez, incidiu en que o punto quilométrico 60 da N-640 é “un punto moi complicado, un punto negro da estrada onde houbo varios accidentes”.

Segundo explicou, o mal estado do firme provoca que os vehículos teñan que cambiar de carril para evitar as fochancas, co conseguinte perigo para a circulación. Ademais, desde a asociación reclaman tamén outras actuacións necesarias para mellorar a seguridade neste punto, como habilitar unha saída cara á estrada do barrio de Paraxes e dotar a zona de iluminación para os usuarios da vía e os veciños. “É un sitio moi conflitivo e moi problemático”, subliñou.

Tras escoitar as demandas do Concello e da veciñanza, o deputado do PP no Congreso, Francisco Conde, reiterou a necesidade de que o Goberno actúe con urxencia nesta estrada.

Conde lembrou que o Partido Popular xa levou iniciativas ao Congreso dos Deputados para reclamar melloras na rede de estradas do Estado en Galicia e advertiu de que o estado dalgúns tramos da N-640 está a poñer en un grave risco a seguridade dos usuarios.

“Estamos acompañando aos veciños de Pastoriza e á asociación de Fonmiñá que están reivindicando unha actuación inmediata e necesaria na N-640 ao seu paso polo quilómetro 60, unha situación que está poñendo en perigo a seguridade viaria”, sinalou.

Neste sentido, reclamou ao Goberno central unha actuación inmediata que inclúa a mellora do firme, a instalación de iluminación e a adopción de medidas que permitan realizar as incorporacións á estrada con maiores garantías de seguridade.

Ademais, o PP tamén levou esta problemática ao Parlamento de Galicia hai menos dun ano a través dunha iniciativa na que se solicitaba ao Goberno central a realización de actuacións neste punto da estrada.

Así, a deputada autonómica Nicole Grueira subliñou que os populares continúan insistindo na necesidade dunha intervención completa nesta vía. “Recollemos as demandas dos veciños e seguimos insistindo na necesidade dun arranxo completo da N-640. Non se pode actuar a medias nin situar a veciñanza de primeira e de segunda”, afirmou.

Grueira advertiu de que actualmente esta estrada “atópase nun estado moi perigoso” e sinalou que son “moitos os que sofren picadas e avarías nos seus vehículos como consecuencia do mal estado desta vía”.

Por iso, pediu ao Goberno central “unha actuación integral sen diferenzas entre concellos que solucione de inmediato e de maneira definitiva este problema, garantindo a seguridade de todas as persoas que utilizan a N-640”.