Dúas irmás para abrir xuntas as festas de Vilalba
Nesta edición das festas patronais, as pregoeiras serán as irmás Purriños, Yolanda e Inma, dúas destacadas fotógrafas vilalbesas que colleitan importantes éxitos na súa carreira profesional; sumando numerosos recoñecementos nas cualificacións anuais da Federación Española de Profesionais da Fotografía e a Imaxe, así como varias nominacións aos Premios Goya.
Por primeira vez, serán dúas irmás as encargadas de inaugurar as festas, acto que terá lugar este sábado, día 30 de agosto, a partir das 19.00 horas.
As protagonistas da presentación, Yolanda, Inma e Eduardo, amosaron o seu agradecemento e sentimento de honra por formar parte da presente edición das festas de San Ramón e Santa María de Vilalba, cun papel tan destacado como o seu.
Dende o Concello de Vilalba puxeron en valor a súa traxectoria e “o orgullo que supón para nós que dúas veciñas vilalbesas, referentes no seu ámbito profesional e cun forte lazo con Vilalba, se convertan nos protagonistas das nosas festas patronais” asegurou a alcaldesa de Vilalba, Marta Rouco.
Pola súa banda, a concelleira de cultura, Mónica González tamén se amosou “moi agradecida polas facilidades que tanto as irmás Purriños, Yolanda e Inma me brindaron para que esta proposta saíra adiante”.
As dúas fotógrafas tamén quixeron contarnos un pouco o que supón este experiencia para elas.
Como recibiron a noticia de que foron escollidas para ser pregoeiras das festas?
A verdade é que cando Mónica nos dixo a noticia foi unha grata sorpresa. Non o esperabamos pero nos fixo moita ilusión. En especial polos nosos pais.
Teñen unha gran vinculación coa cidade e a súa actividade?
Os nosos pais son de parroquias próximas, eles viñeron para Vilalba fai 51 anos, dende aquela que abriron o seu negocio aquí, toda a nosa vida transcorre neste pobo.
Poden adiantarnos un pouco do que van falar no pregón?
Os pregóns sempre son lembranzas e vivencias dos pregoeiros, nós esperamos desvelalas no pregón (risas).
Que lembranzas gardan das festas e da súa evolución ao longo dos anos?
O que nunca cambia é que te reencontras con moita xente, que non está en todo o ano, e que nestas datas pasa por Vilalba. O olor característico que desprenden as árbores cando se pasa por diante da Casa da Cultura e o cheiro da churrería á volta da esquina.
Son dúas irmás que a súa vida vai parella a todos os niveis. Como se forxou esa conexión?
Sempre tivemos moita comunicación, sempre pensamos na outra, antes que nunha mesma, axudámonos todo o que podemos. É máis bonito o camiño acompañadas que soas.
Como se inclinaron pola fotografía?
Os nosos pais sempre nos ensinaron dende pequenas, sen presionar, era como un xogo, sempre nos deixaron usar as cámaras ou as luces do estudio, gustábanos moito acompañalos ós reportaxes que eles ían. O final é unha paixón, é un traballo e unha afección.
Por que escolleron Vilalba? Nunca quixeron probar noutros lugares?
Nós temos estudios en Vilalba e en Lugo capital. Xa os nosos pais tiñan os dous antes de comezar nós coa fotografía. Así que seguimos os seus pasos, a verdade é que ser a segunda xeración axuda moito.
Que lles queda por facer? Cal vai ser o próximo obxectivo?
Sempre quedan moitas cousas por facer, e oxalá nos queden durante moitos anos, o máis importante é non estar nunca conforme, sempre ter ilusión e ganas. Pero temos bo mestre en iso, xa que o noso pai é incansable.