Estudantes de Zaragoza de intercambio na Pastoriza foron recibidos na Deputación e no Concello
![estudantes pastoriza zaragoza1](https://terrachaxa.com/wp-content/uploads/2022/06/estudantes-pastoriza-zaragoza1.jpg)
A Deputada de Réxime Interior, Promoción do Territorio e Turismo, Pilar García Porto, recibiu este xoves no Pazo de San Marcos a 56 escolares de entre 11 e 12 anos do CEIP O Salvador da Pastoriza e do Centro Rural Agrupado Bajo Gállego de Zaragoza. Ambos centros, que recibiron un premio do Ministerio de Educación polo seu proxecto conxunto Sustentabilidade, saúde e deporte no medio rural, participan estes días nun intercambio que se enmarca nese recoñecemento.
No encontro que tivo lugar no Salón de Actos, García Porto explicoulles o que é a Deputación e o papel que xoga no día a día dos cidadáns. Puxo en valor o patrimonio natural da provincia e a ampla diversidade que atesoura o territorio lucense.
Os escolares visitaron pola mañá a Ribeira Sacra, viaxaron no catamarán da Deputación que parte de Ponte do Sil invitados pola institución e xa pola tarde coñecerán a cidade de Lugo.
Este grupo de alumnos de intercambio foron recibidos o luns tamén no Concello da Pastoriza pol seu alcalde, Primitivo Iglesias.
![estudantes pastoriza zaragoza2](https://terrachaxa.com/wp-content/uploads/thumbs/2022/06/estudantes-pastoriza-zaragoza2-200x104.jpg)