Euroeume lanza 'Enraizadas 2024' impulsando a agroecoloxía e a igualdade de xénero no rural
A Asociación Euroeume presentou o programa “Enraizadas 2024”, unha iniciativa que desde o 2021 promove a agroecoloxía, a soberanía alimentaria e o desenvolvemento sostible no rural, con especial atención ao papel das mulleres e unha perspectiva ecofeminista. Este ano, o programa centrará os seus esforzos en explorar como as prácticas de coidados, entendidas como responsabilidade común, poden enriquecer o desenvolvemento comunitario.
O programa inclúe varias actividades, como o obradoiro “Ten_Cuidado” que terá lugar o 19 de novembro ás 18:30 horas na Casa da Cultura de Pontedeume. Impartido polo Colectivo Larre, o taller presentará a súa "Caja de Herramientas de Te(n) cuidado", que ofrece recursos para adoptar e adaptar prácticas de coidado nas asociacións e colectivos. A inscrición previa é necesaria, dado o aforo limitado, e pode realizarse no correo euroeume@euroeume.org.
O 22 de novembro, ás 18:00 horas, tamén na Casa da Cultura de Pontedeume, inaugurarase a exposición do proxecto, seguida ás 19:00 horas pola mesa redonda “Agroecoloxía, coidados e comunidade”. No debate participarán a investigadora Marta Soler Montiel, a educadora agroecolóxica Coqué Saavedra Carballido e María Ferreiro Santos, da Secretaría da Muller do Sindicato Labrego Galego, que aportarán as súas experiencias e visións sobre a agroecoloxía desde a práctica e a perspectiva de xénero.
O programa inclúe ademais o Programa Educativo Enraizadas, que levará estas temáticas ao ámbito educativo da comarca para poñer en valor o rol das mulleres no sector rural e as súas achegas na investigación e docencia agroecolóxica. "Enraizadas 2024" conta co apoio da Deputación da Coruña e a colaboración do Concello de Pontedeume, que cede os espazos para o desenvolvemento das actividades.