Éxito absoluto na primeira xornada do Día Infantil das festas de Vilalba
A praza da Constitución de Vilalba encheuse no día de onte de inchables e actividades para nenos e nenas con motivo da celebración do primeiro día infantil das festas patronais, patrocinado por Grupo Entrepinares e organizado pola Concellería de Infancia e Xuventude en colaboración coa Alcaldía.
Dende as 11.30 comezaron a chegar os mozos e mozas máis puntuais á praza da Constitución, onde se atopan colocados sete inchables para diferentes idades, un Shotter Gallery, un toro mecánico, un simulador de surf, unha Nerf Battle Arena e un fotomatón con plataforma 360 para que todos poidan levar consigo un recordo da xornada.
"Durante a mañá achegáronse centos de nenos e nenas acompañados polas súas familias para gozar deste día completamente pensado para eles" sinalou a concelleira de Infancia e Xuventude, que se achegou ata a Praza da Constitución acompañada pola alcaldesa, Marta Rouco.
Pola tarde, ás actividades lúdicas sumouse o reparto gratuíto dunha merenda composta por auga, proporcionada por Mercadona, e snacks de queixo do Grupo Entrepinares para todos os nenos e nenas que se acheguen a celebrar o día infantil ata as 20.00, hora á que finalizará a xornada.
Pero aínda quedará tempo de gozar de máis actividades infantís durante o día de hoxe, 4 de setembro. Ao final, debido á meteoroloxía, no lugar de inchables acuáticos na praza da Constitución instalaranse os inchables da primeira xornada, que se sumarán a outros novos como unha pista americana.
O que se manterá será a festa da espuma, que se celebrará ao final para pechar a celebración dos días infantís. Ademais, volverán contar cunha merenda gratuíta con snaking de queixo ofrecido por Grupo Entrepinares e augas proporcionadas por Mercadona. O horario é de 11:30 a 14:00 e de 16:00 a 20:00.
