Friol acollerá unha xornada de iniciación ao motociclismo para nenos e nenas o 1 de maio
O vindeiro 1 de maio, o Concello de Friol será escenario dunha nova e atractiva actividade deportiva coa celebración da xornada "Xogade coas motos", unha iniciativa dirixida a rapaces e rapazas de entre 8 e 16 anos que busca achegar o motociclismo de velocidade aos máis novos dun xeito seguro e educativo.
A actividade, incluída na Xira 2025 de Xogade coas motos e promovida pola Xunta de Galicia e Deporte Galego, ofrecerá 40 prazas que se cubrirán por rigorosa orde de inscrición a través da web www.xogadecoasmotos.com. As inscricións abriranse o martes 15 de abril ás 11:00 horas, e terán preferencia o alumnado do CPI Dr. López Suárez e os nenos e nenas empadroados no concello de Friol.
O evento, organizado polo Concello de Friol en colaboración co centro educativo público da localidade, achegará todo o material necesario para a actividade, incluíndo motos, cascos e monos para garantir a seguridade dos participantes.
A xornada terá lugar na Estrada do Club Fluvial, e contará co apoio de patrocinadores como VFTiming, Nauteka, PitBikeGP.com, Orca e Impormotor, e coa colaboración da Federación Galega de Motociclismo.
Baixo o lema 'Divírtete, aprendendo', esta proposta ofrece unha oportunidade única para iniciarse no mundo do motociclismo, combinando aprendizaxe, seguridade e diversión.