Friol acollerá unha xornada divulgativa sobre o papel das abellas no medio rural
O Concello de Friol organizará o próximo 14 de marzo unha xornada divulgativa centrada na importancia das abellas para o medio rural, unha actividade aberta a toda a veciñanza e ás persoas interesadas en coñecer mellor o papel destes insectos na natureza e na agricultura.
O encontro celebrarase ás 17:30 horas no salón de actos do Centro Sociocultural de Friol e incluirá unha presentación audiovisual e unha charla explicativa na que varias persoas participantes compartirán coñecementos sobre a relación das abellas coa biodiversidade, a produción agrícola e a vida no rural. Durante a sesión tamén se proxectarán diferentes documentais co obxectivo de achegar ao público información sobre este insecto fundamental para os ecosistemas.
Na actividade intervirán Erea Moreno Pena, Antía Fernández Pena, Vera Abel Corral, Iria Barcia e Suso Rodríguez, que abordarán diferentes aspectos relacionados coa apicultura e coa función das abellas no equilibrio ambiental.
A xornada está organizada polo Concello de Friol e conta coa colaboración da Universidade de Santiago de Compostela a través do seu Departamento de Pedagoxía e Didáctica. Con esta iniciativa preténdese sensibilizar á cidadanía sobre a relevancia das abellas para a biodiversidade e para o mantemento da actividade agraria no rural galego.