Friol, entre os cinco mellores destinos rurais de España
O municipio lucense de Friol foi recoñecido como un dos cinco mellores destinos de España no certame nacional Capital do Turismo Rural 2025, organizado pola plataforma Escapada Rural. O concello acadou a quinta posición na votación final, converténdose ademais no único representante galego que chegou á fase final do concurso.
Desde o Concello celebraron este logro como “un orgullo para toda a veciñanza”, destacando que ser finalista xa supón un importante recoñecemento ao traballo de promoción e posta en valor do territorio. “Friol garda historia, natureza e tradicións que merecen ser amosadas”, subliñou o alcalde, José Ángel Santos, quen agradeceu o apoio e a implicación da cidadanía durante todo o proceso de votación.
O certame, que cumpre a súa novena edición, ten como obxectivo visibilizar vilas e aldeas que conservan un destacado patrimonio natural, cultural e gastronómico fóra das rutas turísticas máis habituais. Na edición anterior, o título recaeu en Santa Eulalia de Oscos (Asturias), e nesta ocasión Friol compartiu candidatura con localidades como Ágreda (Soria), Jerez de los Caballeros (Badaxoz), Karrantza Harana (Biscaia), Navahermosa (Toledo), Tibi (Alacant), Trasmoz (Zaragoza), Valtierra (Navarra), Vielha (Lleida) e Zuheros (Córdoba).
O municipio lucense destacou na competición pola tranquilidade do seu contorno rural, os seus pazos e hórreos, a riqueza patrimonial das súas máis de trinta parroquias e a súa gastronomía singular, protagonizada polos queixos con Denominación de Orixe Protexida Arzúa-Ulloa e pola tradicional Feira do Pan e do Queixo, unha das máis emblemáticas de Galicia e recoñecida a nivel estatal.
Ademais, o portal organizador Escapada Rural recomenda Friol como un destino de referencia no turismo de interior, citando establecementos como Casa Villar ou The Land of Eve, xunto con outros 79 aloxamentos rurais situados no municipio e nas súas inmediacións.
O Concello de Friol agradeceu publicamente o apoio de todas as persoas que participaron na votación e contribuíron a dar visibilidade ao municipio. “Ser o único finalista galego e estar entre os cinco mellores de España é xa unha vitoria colectiva”, sinalan desde a administración local, que anima a seguir promovendo o orgullo e a identidade friolesa a través do turismo sostible e a hospitalidade da súa xente.