Gaitafilmes organiza en Meira o festival de curtas M de cine
![CARTEL M DE CINE 2017 (1)](https://terrachaxa.com/wp-content/uploads/2017/12/CARTEL-M-DE-CINE-2017-1.jpg)
O 30 de decembro a Casa da Cultura de Meira acollerá o festival de curtas M de Cine, que cumpre este ano a súa oitava edición.
O evento, organizado por Gaitafilmes, está adicado á memoria de Xosé Salgado (Xose da Flor), falecido o pasado mes de novembro e que foi un dos impulsores deste festival, ó igual que doutras moitas actividades culturais, como presidente da Asociación Cultural Eme de Meira. O M de Cine forma parte dun amplo programa de actividades que coordina esta asociación, e conta coa colaboración, ademais de Eme de Meira, do Concello de Meira, a Deputación de Lugo e Microefectos Dramatúrxicos.
A xornada arrincará ás 18:30 coa peza de teatro ‘Magic Man’ de Microefectos Dramatúrxicos, en homenaxe a Xose da Flor. O programa continuará coa proxección de cinco curtametraxes galegas: Matria, Einstein-Rosen, Cat in the Window, Escarabana e Amanece Despejado . Entregarase o ‘Premio Xose da Flor’ á curta gañadora, que será elexida coa votación do público asistente.
Como vén sendo habitual en todas as edicións do M de Cine, o humor será outro dos protagonistas na xornada. O evento será conducido por dúas divertidas nubes e non faltará o mítico “test meirego” con preguntas aos veciños e veciñas da vila.
A xornada rematará coa proxección da longametraxe Dhogs. Haberá dous pases, un ás 21:30 e unha sesión golfa ás 23:30. Xa non quedan entradas para a primeira das sesións, pero poden recollerse para a segunda de forma gratuíta nos bares Centro, Tibor e Pedreira, ademais da Casa da Cultura de Meira. Na presentación ademais dos membros de Gaitafilmes (Andrés Goteira, Suso López, Adrián Folgueira e Laura Doval) estarán os actores Antonio Durán ‘Morris’, Miguel de Lira, María Costas, Melania Cruz e Xosé López.
PROGRAMA:
18:30. “Magic Man (de Meira)”. Peza de microteatro do grupo Microefectos Dramatúrxicos en homenaxe a Xose da Flor > Test Meiregos > Curtas: Matria, Einstein-Rosen, Cat in the window, Escarabana, Amanece Despejado.
21:30. Estrea Dhogs (Entrada gratis con invitación)*. > Entrega do Premio Xose da Flor á mellor curta.
23:30. Sesión golfa Dhogs (Entrada con invitación)*.
(*) Invitacións nos bares Centro, Tibor, Pedreira e na propia Casa da Cultura. Se sodes de fóra, podedes escribirnos a quenvai@dhogsfilme.com para reservar a vosa invitación.
(**) Dhogs. Película non recomendada para menores de 18 anos. Organiza Gaitafilmes con colaboración do Concello de Meira, a Deputación de Lugo, Microefectos Dramatúrxicos e a Asociación Cultural Eme de Meira.
CURTAMETRAXES:
MATRIA (2017)
Director: Álvaro Gago
Con: Eulogia Chaves, Pilar Fragua, Marta Resille, Ramón Martínez, Marta Resille, Sara Dios, Janet Romero.
Sinopse.Ramona vive co seu marido, con quen apenas se comunica e traballa nunha fábrica de conservas, gobernada por unha encagada tirana. Ante os desafíos que lle presenta a súa rutina diaria, Ramona trata de refuxiarse na relación que lle une á súa filla e á súa neta.
Festivais máis importantes: Sundance 2018, Seminci 2017, Alcine 2017
ESCARABANA (2017)
Directora: Sara Casasnovas
Con:Iván Marcos, Ana Oca, Sara Casasnovas.
Sinopse: A fame, a bruma, a fuxida. Unha parella atrapada na eternidade. Unha viaxe sen fin cara á propia natureza, conducindo cadillacs e escapando do sol.
EINSTEIN-ROSEN (2016)
Directora: Olga Osorio
Con: Teo Galiñanes, Óscar Galiñanes, Xúlio Abonjo, Ricardo de Barreiro.
Sinopse. Verán do 82. Teo asegura que atopou un buraco de verme. O seu irmán Óscar non lle cre… Polo menos de momento.
AMANECE DESPEJADO (2017)
Directores: María Vázquez e Bruno Máez
Con: María Vázquez, Melania Cruz, Dani Lago, Antonio Pereira, Modesto García, Delia Lorenzo e Iñaki Díaz.
Sinopse: Hoxe é un día importante para María: vai dar unha conferencia sobre o famoso escritor de ciencia ficción Philip K. Dick.
CAT IN THE WINDOW (2017)
Director: Félix Brixel
Con: Marin Laufenberg
Sinopse. Marin imaxínase como será o seu futuro cando envelleza. Pronto admitirá que o que a impulsa a un futuro solitario en Alaska é o medo a ocuparse dos demais. Sen embargo, unha man sacará o seu autorretrato dun lago e poñerá a secalo nunha mesa. A dor, e ao mesmo tempo o calmante de Marin, é esa man que nunca deixará que se vaia.