García Novo presenta en Vilalba 'Os madrileños non sempre veñen en agosto'
O Instituto de Estudos Chairegos, en colaboración co Concello de Vilalba, organiza a presentación do libro Os madrileños non sempre veñen en agosto, de Francisco García Novio, publicado por Medulia Editorial.
O acto terá lugar o venres 21 de marzo de 2025, ás 20:00 horas, na Casa da Cultura de Vilalba. No evento intervirán o propio autor, Francisco García Novio, acompañado por Marisa Barreiro Mejuto e Manuel Castro Santamariña.
Os madrileños non sempre veñen en agosto conta a historia de Sabela, unha moza que vive en Madrid e que, tras unha ruptura matrimonial, decide regresar á súa aldea natal a mediados de maio, algo pouco habitual na zona, onde o costume é que os madrileños volvan en agosto. Esta decisión esperta curiosidade entre a veciñanza.
Xa na súa vila e aínda entre bágoas e suspiros, Sabela descobre que Antón e Paulo, amigos da súa infancia e compañeiros de escola, están distanciados de xeito irreconciliable. Movida pola curiosidade, decide investigar as causas desa inimizade, preguntando tanto aos protagonistas como á veciñanza. O que Sabela non podía imaxinar eran as consecuencias que esas pescudas traerían para eles e para ela mesma.
Francisco García Novio naceu na aldea de Santa María de Marrozos, preto de Santiago de Compostela, o 30 de agosto de 1953. Estudou Medicina en Santiago e especializouse en Uroloxía na Coruña, exercendo esta profesión desde 1977 ata a actualidade.
No ámbito literario, García Novio confésase lector dende a infancia e escritor de relatos. Ten publicados dous libros: Os madrileños non sempre veñen en agosto (Editorial Medulia, 2023) e A voz do mosquito (Editorial Medulia, 2024)