Guitiriz abre o prazo para as súas escolas deportivas municipais
O Concello de Guitiriz abrirá o martes 10 de setembro, o prazo de inscrición para participar nalgunha das propostas que incorporan as Escolas Deportivas Municipais para o curso 2024/2025. A matrícula poderá formalizarse ata o 22 de setembro de xeito presencial na casa consistorial, en horario de 8.30 a 14.30 horas, ou a través da sede electrónica municipal.
Cada persoa só poderá rexistrar as súas solicitudes e as dos seus fillos e fillas menores de idade. As prazas cubriranse por estrita orde de entrada. O prezo das actividades será de 15 euros ao mes por alumno e actividade e o prezo da matrícula de 10 euros, que se aboará unha vez que a persoa estea admitida na actividade solicitada.
A oferta deportiva inclúe: fútbol sala, ximnasia rítmica, patinaxe, tenis de mesa, ximnasia para adultos, actividades aeróbicas (aerobic, zumba, step), zumba infantil, atletismo e campo a través, pádel, tiro con arco, pilates e ioga. O Concello de Guitiriz aplicará descontos na matrícula nos seguintes supostos: 20 % aos membros de familias numerosas, 20 % na segunda actividade por estar matriculado en dúas ou máis e, por último, para familias con poucos recursos.