Guitiriz acolle de novo a mostra 'Tal como éramos'

Mostraranse 120 fotografías de temática diversa nas que se poderá gozar e aprender como era a vila chairega no pasado.

A Casa Habanera acollerá, un ano máis, a exposición Tal como éramos de fotografía antiga de Guitiriz e as súas xentes.

Esta será a sexta edición que organiza o Instituto de Estudos Chairegos, que correspondería facer xa no pasado ano, pero que foi adiada por mor da Covid-19.

Como nas anteriores edicións, nesta exposición móstranse 120 fotos en branco e negro e de temática diversa na que as persoas asistentes poderán gozar e aprender como era a vida na vila chairega durante a segunda metade do século pasado.

A mostra estará aberta ao público a partir do vindeiro venres, 17 de decembro, ás 19:00 horas. Ese mesmo día realizarase un visionado comentado de todas as fotos expostas.