Celébrase en Guitiriz o 14º Obradoiro de Nutrición en Pacientes con Enfermidade Renal Crónica
Guitiriz será a sede do 14º Obradoiro de Nutrición en Pacientes con Enfermidade Renal Crónica (ERC), que se celebra entre os días 25 e 27 de abril. O evento está organizado polo Hospital Ribera Polusa e o Grupo de Nutrición ERC da Sociedade Española de Nefroloxía, e contará coa participación de destacados profesionais da medicina e nutrición, tanto do ámbito estatal como internacional, especializados na abordaxe da ERC.
O acto inaugural terá lugar o venres 25 de abril ás 16:30 horas no Hotel Iberik de Guitiriz, espazo que acollerá o encontro. Na apertura estará presente o doutor Secundino Cigarrán Guldrís, presidente do comité organizador e responsable do deseño dun completo programa de actividades que inclúe mesas de debate, talleres prácticos e conferencias maxistrais.
Este obradoiro, dirixido a nefrólogos, nutricionistas e persoal de enfermería das unidades ERCA, consolidouse como unha cita de referencia no calendario científico para a actualización e intercambio de coñecementos arredor da enfermidade renal crónica.
Entre os profesionais participantes destacan a doutora María Luisa González Casaus do Hospital Universitario La Paz de Madrid; o doutor Emilio González Parra da Fundación Jiménez Díaz de Madrid; o doutor Pablo Ureña Torres, xefe de servizo do AURA-Nord Saint Ouen de París; o doutor Aleix Cases Amenós do Hospital Clínic de Barcelona; a doutora Mª Ángeles Romero Rodríguez da Universidade de Santiago de Compostela; a doutora Susana García Melendreras do Hospital de Cabueñes en Xixón; a doutora Almudena Pérez Torres do Hospital Universitario La Paz e IdiPaz; o doutor Ángel Nogueira dos Centros de Diálise Avericum de Las Palmas de Gran Canaria; o doutor Juan Latorre Catalá do Centro de Saúde San José da Coruña; e a doutora Guillermina Barril Cuadrado da Fundación de Investigacións Biomédicas de Madrid.