Imparten en Begonte un obradoiro sobre prevención de infeccións e antibióticos
O Concello de Begonte, en colaboración coa Escola Galega de Saúde, organiza o próximo lun 14 de outubro un curso sobre a prevención das infeccións e o uso de antibióticos dirixido a pacientes, familiares, coidadores de persoas dependentes e cidadanía en xeral, con carácter gratuíto.
Os obxectivos do mesmo son coñecer o significado de infección e enfermidade infecciosa, dotar das habilidades para diferenciar enfermidade vírica e enfermidade bacteriana, coñecer os mecanismos de transmisión das enfermidades, poder recoñecer os principais grupos de risco e consellos para evitar as enfermidades infecciosas.
No curso trataranse os conceptos de enfermidade infecciosa, a diferencia entre virus, bacterias, fungos e parásitos; os mecanismos de transmisión das enfermidades infecciosas; os grupos de risco; consellos para previr as enfermidades infecciosas; a hixiene de mans e o uso adecuado dos antibióticos.
O curso será impartido de 17.00 a 21.00 horas polo docente Enrique del Arco Herrero, licenciado en Farmacia e técnico en Prevención de Riscos.
A inscrición pecharase o 8 de outubro.