Lanzós prepárase para celebrar a décima edición da Festa da Xuventude o vindeiro 18 de outubro
A parroquia de Lanzós, no concello de Vilalba, acollerá o sábado 18 de outubro de 2025 a décima edición da Festa da Xuventude, unha cita xa consolidada no calendario festivo da comarca. Organizada pola asociación Xuventude de Lanzós, a celebración promete unha noite chea de música, animación e moitas sorpresas para todos os asistentes.
O cartel musical desta edición está composto por catro agrupacións de renome. A Mekanika Rolling Band abrirá a tarde cun espectáculo cheo de enerxía e ritmos modernos. Seguiralle o grupo Punto Clave, coñecido polo seu estilo variado e capacidade para conectar co público, que iniciará a verbena, pero que tamén protagonizará a sesión vermú. A festa continuará coa actuación da orquestra Marbella, que ofrecerá un repertorio pensado para todos os gustos, e pechará a noite a orquestra Panorama City, unha das máis recoñecidas no panorama galego, garantindo unha actuación espectacular.
Destaca o xantar que se servirá ao mediodía, a base de empanada, xamón cocido, polbo á feira, costela asada con patacas, sobremesa, café e bebidas, a un prezo de 35 euros. Para os nenos haberá un menú especial, de 18 euros con macarróns e milanesa de polo con patacas. Os menores de 5 anos non pagan.