Licitadas as obras de rehabilitación e reforma interior da Praza de Abastos ribadense
![Licitadas as obras de rehabilitación e reforma interior da Praza de Abastos ribadense](https://terrachaxa.com/wp-content/uploads/2019/10/0-4-e1570863343685.jpg)
O Concello de Ribadeo vén de sacar a licitación as obras de rehabilitación e reforma interior da praza de abastos, que suporán un investimento de preto de 60.000 euros (Ive incluído). O proxecto é financiado con fondos propios e cunha achega xestionada ante o Agader. As empresas interesadas dispoñen de 20 días para presentar as súas ofertas.
As obras resolverán tanto as necesidades de funcionamento fundamentais para o desenvolvemento da actividade como os aspectos formais para adaptarse á normativa e permitir unha maior comodidade e confort tanto aos praceiros como á clientela en xeral.
O que se pretende é modernizar a imaxe da planta baixa da praza co obxecto de consolidar este espazo como referente na venda de produtos frescos e de calidade así como atraer máis clientes. Búscase facer da praza un espazo máis moderno e luminoso. Parte dos traballos que se van acometer están enfocados á mellora da eficiencia dos recursos enerxéticos e á mellora das condicións de accesibilidade, tamén dos aseos e dos servizos comunitarios deste edificio.
Vaise renovar o pavimento, así coma os aseos para adecualos á normativa de accesibilidade; cambiarase a iluminación interior colocando novas luminarias LED; mellorarase a rede de saneamento e tamén a sinalización interior, de forma que permita identificar os establecementos existentes, a súa ubicación e outros servizos e información complementaria da praza”.
O prazo de execución das obras que se acometerán na praza de abastos será de 2 meses.
Dende o Concello indicaron que “o prazo para presentar ofertas de acordo con esta licitación é de 20 días a contar desde o 1 de outubro. Toda a documentación está a disposición dos interesados na plataforma de contratos do Estado. A obra realizarase integramente no ano 2021, iniciarase no mes de xaneiro, despois das datas propias do Nadal, tamén de acordo cos praceiros para reducir os perxuizos económicos e doutro tipo nos próximos meses e propios deste tipo de obras”.