LINA actúa o día 31 nas Pontes para presentar o seu último traballo
A recoñecida artista portuguesa LINA_ ofrecerá un concerto único no Auditorio Municipal Cine Alovi das Pontes o vindeiro venres 31 de xaneiro, ás 20:30 horas, para presentar o seu último traballo discográfico, Fado Camões.
Este álbum, editado a nivel internacional en xaneiro de 2024 polas discográficas Galileo Music e UGURU, xa se converteu nunha referencia mundial, obtendo galardóns como o de Mellor Álbum Europeo 2023/24 e alcanzando o posto número 3 no TOP 100 de Álbums da Transglobal World Music Chart.
En Fado Camões, LINA_ inspira a súa música na lírica do poeta Luís de Camões, combinando fados tradicionais con composicións orixinais da propia cantante. O disco, que reflicte unha profunda sensibilidade artística, conta coa colaboración do músico e produtor británico Justin Adams, quen achega un toque innovador ao traballo.
Aqueles que desexen asistir a esta experiencia musical única poden adquirir as súas entradas a través da plataforma en liña municipal.