Lousada de Abaixo celebra as súas festas en abril
A parroquia de Lousada de Abaixo, en Xermade, xa ultima os preparativos para celebrar as súas tradicionais festas na honra á Virxe das Dores e ao Santo Cristo, que terán lugar os días 26 e 27 de abril de 2025.
A programación festiva arrincará o sábado 26 de abril, cunha misa solemne ás 13:30 horas, seguida da procesión e da sesión vermú, que estará amenizada pola Orquestra Galaxia. Pola noite, a festa continuará cunha gran verbena a cargo das orquestras Galaxia e Los Satélites, garantindo unha noite chea de música e diversión.
O domingo 27 de abril, repetirase o programa relixioso con misa solemne, procesión e sesión vermú, nesta ocasión amenizada polo grupo Máster. Ao rematar as festas, haberá xogos no campo cuberto con carpa e aparcamento gratuíto para todos os asistentes.
Ademais, xa se anuncian as Festas de Lousada de Arriba, que terán lugar os días 7 e 8 de xuño, con animación musical a cargo das orquestras Capitol e Los Adrianos.
A organización das festas corre a cargo da Comunidade de Montes de Lousada, coa colaboración do Concello de Xermade.