Máis de 7.000 escolares participan na cuarta edición do programa ‘Da Escola á Granxa’
Esta semana comezaron as actividades formativas do programa ‘Da Escola á Granxa’, impulsado pola área de Rural da Vicepresidencia da Deputación de Lugo, que nesta cuarta edición achegará a máis de 7.000 alumnas e alumnos de infantil e primaria ás granxas e proxectos de emprendemento rural en toda a provincia.
A deputada Iria Castro participou nunha das primeiras actividades, na que nenas e nenos do CEIP de Castroverde visitaron a granxa e produción de mel Pingas de Gaia, situada no lugar de Besta de Arriba, en San Simón da Costa, Vilalba.
Durante a visita, os escolares recibiron explicacións de Iván Díaz sobre a vida das abellas, o seu papel na conservación da biodiversidade e na produción de mel e derivados, así como o manexo de útiles básicos para a apicultura. Ademais, puideron degustar mel da granxa acompañado de queixo de San Simón da Costa.
A ANPA do Colexio Público de Castroverde é unha das 73 asociacións beneficiarias desta cuarta edición, que programará un total de 200 actividades formativas ata final de ano, co obxectivo de transmitir ás novas xeracións as oportunidades do rural e a súa importancia na produción de alimentos e conservación do territorio.
As asociacións de nais e pais elixiron as actividades entre un amplo catálogo formativo, no que participan 45 granxas e proxectos de emprendemento relacionados coa produción alimentaria. A área de Rural da Vicepresidencia da Deputación de Lugo financia os desprazamentos e o desenvolvemento das actividades por parte das gandeiras e gandeiros. O programa conta este ano cun orzamento total de 200.000 euros.