Mariña Esmorís e Eugenia Vérez fanse co ouro e a prata xuvenil no Campionato Galego de Tríatlon
O Club Tríatlon Vilalba regresou de Ferrol cun balance moi positivo do Campionato Galego de Tríatlon, especialmente na categoría xuvenil feminina, onde Mariña Esmorís acadou a medalla de ouro e Eugenia Vérez proclamouse subcampioa.
Desde a entidade destacan que estes resultados son froito do esforzo e da preparación das deportistas, ao tempo que xa se atopan ultimando os detalles para as próximas competicións do calendario.
A alcaldesa de Vilalba, Marta Rouco, e a concelleira de Deportes, Paula Vigo, felicitaron ao club polos seus novos logros, lembrando que xa tiveron ocasión de recibir aos seus integrantes en recoñecemento ao traballo realizado. “Seguimos con orgullo cada un dos éxitos que colleitan. Son un exemplo de constancia e talento que leva o nome de Vilalba moi alto”, subliñaron.