Marisol Morandeira presenta o equipo co que optará á reelección
O Partido Socialista de Guitiriz presentou hoxe a súa candidatura para as eleccións municipais do 28 de maio. No acto, celebrado no restaurante A Casilla, a candidata á alcaldía, Marisol Morandeira, anunciou a súa intención de “traballar por e para Guitiriz, porque o mellor para Guitiriz é o PSdeG-PSOE”.
Na presentación, á que asistiron máis dun centenar de persoas, entre elas moitos compañeiros e compañeiras do PSdeG, a actual alcaldesa de Guitiriz indicou que “estamos coas mesmas ganas e ilusión de hai catro anos, ou máis” e destacou “o potencial que ten Guitiriz, que é moito”, amosando a súa confianza nas posibilidades do seu equipo “para aproveitalo”.
“Nestes anos traballamos a reo, sentamos as bases para que agora, no que vén, Guitiriz tome o impulso que necesita para medrar”, explicou, subliñando a política para as persoas como eixo da súa campaña xa que “como fixemos ata agora, a nosa política e a nosa forma de gobernar estará centrada no social, nas persoas, en facer melloras e investimentos para cambiar para ben o seu día a día”.
Morandeira tamén sinalou que “non se deixarán de lado outros eidos como o impulso ao sector primario, tan importante no noso municipio; o fomento do emprego, que terá un gran aliado na próxima e agardada reapertura do balneario; a aposta polo deporte e os nosos deportistas, que levan o nome de Guitiriz por Galicia, España e o mundo adiante; ou o pulo da nosa oferta cultural, que ano a ano está a medrar”.
OS CANDIDATOS
-
- María Sol Morandeira Morandeira
- Paula Campo Barral
- Iván Morado Corral
- Carlos Buján López
- María del Pilar Vázquez Ares
- Ramón Rivas Villares
- Sofía Sanchez Miragaya
- Rubén García Oseira
- Marco Antonio Castro Díaz.
- Tamara García Andón
- Ángel Varela Río
- María Pilar Piñeiro Redondo
- Javier Freire Caamaño
Catro anos de experiencia
A candidata lembrou o que significou para ela presentarse por primeira vez como candidata hai catro anos “chea de ilusión e de ideas pero tamén de medos e incertezas”. “Agora, catro anos despois, poido dicir que foi das mellores decisións que tomei na miña vida”, afirmou.
“Poder mellorar a vida da xente, facer máis fácil o seu día a día, coñecer os seus problemas e buscarlle solucións. En definitiva, poder ver de primeira man todo o potencial que ten o teu pobo, Guitiriz, e a súa xente para medrar, é unha experiencia impagable”, salientou.
Fixo referencia ademais a que “desde fóra moitas veces pensas que todo é sinxelo, que as cousas poden facerse simplemente con ter vontade, e, por desgraza, non sempre é así, hai proxectos e ideas que unha ten na cabeza e que, aínda que lle gustaría que fosen doutra forma, requiren os seus tempos”. “Desde dentro adquires a verdadeira dimensión do que é a función pública en xeral e a administración local en concreto, coas súas cousas positivas e tamén negativas”, explicou.
“O que non pode cambiar é a enerxía e a ilusión por sacar adiante as nosas ideas e os nosos proxectos. Por moi difíciles que sexan, por moitas trabas que nos poñan, e aínda que as administracións que teñen as competencias, como é o caso da Xunta de Galicia do Partido Popular, non miren por Guitiriz, nós seguiremos pelexando. Seguiremos apostando porque Guitiriz pode e debe medrar”, espuxo.
Unha lista de xente de Guitiriz para Guitiriz
Marisol Morandeira presentou a todas e todos os integrantes da súa lista, aos que “agradeceu o seu compromiso, non comigo, senón con Guitiriz, porque está formada por xente de Guitiriz que traballa por e para Guitiriz, que coñece as posibilidades e tamén as necesidades do noso pobo e que sabe do seu potencial”.
Nesta presentación Morandeira estivo acompañada polo delegado do Goberno en Galicia, José Ramón Gómez Besteiro, ao que agradeceu “que acudise á nosa chamada” e “por estar, non só agora se non xa desde hai moitos anos, sempre atento aos intereses e necesidades dos veciños e veciñas de Guitiriz”. “É un pracer para min poder arrincar este camiño contando co teu apoio”.
Pola súa parte, Gómez Besteiro cualificou á candidatura do PSdeG PSOE de Guitiriz como “unha lista de xente nova, cunha ilusión renovada de que os próximos catro anos van a ser mellores que os pasados, da man da alcaldesa, que ten unha experiencia importante e iso tamén axuda”.
Besteiro lembrou que “cando hai algún problema o Partido Socialista non escapa, está a demostrarse nos últimos tempos” e destacou que “o noso único obxectivo é mellorar a vida dos veciños e veciñas, de Guitiriz, de Galicia e de España”. “A política é e debe ser alegría”, sentenciou”.
