Médicos de Castro Ribeiras de Lea reciben un premio por un estudo sobre o cancro
Carlota Bugallo, Brais Miguel García e Sonia Muinelo, recoñecidos co primeiro accésit da II Beca de Medicina Rural Asomega-SEMG, presentaron un estudo sobre os efectos desta enfermidade na poboación rural.
Abordaxe poboacional mediante estratexias de prevención primaria e secundaria de cancro no ámbito rural é o título do proxecto que foi recoñecido co primeiro accésit da II Bolsa de Medicina Rural concedida pola Asociación de Médicos Rurais (Asomega) e a Sociedade Española de Médicos Xerais e de Familia (SEMG) e que se queda na Terra Chá.
Os seus autores, os doutores Carlota Bugallo, Brais Miguel García e a residente de terceiro ano Sonia Muinelo, poñerano en marcha na Unidade de Atención Primaria (UAP) de Castro Ribeiras de Lea co obxectivo de "coñecer o mapa de situación da poboación con respecto á enfermidade".
Os autores explican que a súa iniciativa consiste en coñecer a afectación de cancro na poboación da área rural de Castro Ribeiras de Lea, de ao redor duns 6.000 habitantes, realizando un mapeo da mesma, para, a continuación, poder utilizar todas as estratexias de prevención primaria e secundaria das que dispoñemos neste ámbito.
O seu principal punto forte, e o máis visible para os pacientes, “probablemente sexa a realización de talleres de hábitos saudables e prevención de factores de risco cardiovascular, así como a captación precoz e activa, pola nosa banda, en caso dalgún signo ou síntoma de alarma que doutra forma quizais demoraría a consulta e por tanto o diagnóstico desta enfermidade”, explican os médicos que o levarán a cabo.
A xustificación da posta en marcha deste tipo de proxectos no medio rural vén dada, segundo os impulsores, “porque a poboación rural, cada vez máis envellecida e dispersa, necesita das mesmas oportunidades e recursos en canto a saúde, que aquela que vive en zonas urbanas e ten maior acceso aos servizos. É por iso, que debemos ser máis proactivos nestas zonas. A nosa sensación é que a Administración non fomenta para nada que este tipo de proxectos póidanse levar a cabo en Atención Primaria e moito menos en zonas rurais”.
A situación actual na que se atopa a Atención Primaria tampouco axuda. “O tempo que os facultativos poden dedicar a realizar proxectos de investigación vese cada vez máis reducido polas esixencias asistenciais, o déficit de médicos e os contratos temporais, que fan moi difícil poder adaptarse e coñecer profundamente unha cota de pacientes”, apuntan os autores do proxecto.
MÉDICOS RURAIS
Os doutores Carlota Bugallo, Brais Miguel García e Sonia Muinelo consideran que o médico rural “é o prototipo de médico de familia que todos temos en mente, aquel que practica unha medicina integral, realiza prevención e educación sanitaria e coñece perfectamente as necesidades da poboación da que coida”, por iso, é moi importante coidar a esta figura.
O acto público de entrega da II Bolsa de Medicina Rural promovida por Asomega e SEMG patrocinada por Menarini terá lugar o vindeiro sábado, 3 de xuño, no Centro Cultural O Vello Cárcere de Lugo a partir das 12:30 horas.
O evento contará coa presenza do gañador da bolsa, o médico do Centro de Saúde de Laza (Ourense) Albert Keith Foo, e dos doutores recoñecidos con dous accésits nesta edición: por unha banda, os xa mencionados Carlota Bugallo, Brais Miguel García e Sonia Muinelo e, por outro, Tania Salgado, do Centro de Saúde de Folgoso do Courel que conseguiu o segundo accésit.