Meira celebra o Día da Poesía cun programa cultural que mestura literatura e música
O Concello de Meira e a Asociación Cultural Avelino Díaz organizarán o vindeiro 21 de marzo unha xornada especial para conmemorar o Día Mundial da Poesía cun programa de actividades culturais que terá lugar a partir das 12.00 horas no centro da vila.
A celebración incluirá diferentes propostas arredor da literatura e da creación artística. A xornada comezará coa presentación do IX Certame de Debuxo e Creación Literaria Avelino Díaz, unha iniciativa que busca fomentar a creatividade entre o público e manter vivo o legado cultural vinculado á figura do poeta.
Outro dos momentos destacados será a presentación do libro Mea Culpa, do escritor Toño Núñez, que contará coa presenza do propio autor. O acto estará presentado por Marisa Dapereira, quen conducirá a conversa arredor da obra e do proceso creativo do escritor.
Durante a celebración tamén haberá un espazo dedicado á lectura de poemas de Avelino Díaz, unha figura destacada da literatura galega á que está dedicada a asociación cultural organizadora. A programación completarase cunha proposta musical a cargo do grupo ConVersos, que combinará poesía e música nun espectáculo pensado para todos os públicos.
A xornada rematará cunha pequena sesión vermú amenizada por Os Agustínos, que permitirá prolongar a celebración nun ambiente festivo e participativo.
Desde a organización animan á veciñanza e ás persoas amantes da literatura a achegarse ao centro de Meira para gozar dunha mañá dedicada á poesía e á cultura galega.