Meira, en colaboración co Corgo, acolleu unhas xornadas de dinamización lingüística para favorecer a integración de migrantes
O Concello de Meira acolleu recentemente as Xornadas de Dinamización da Lingua Castelá para a Inserción Social e Laboral, unha acción formativa de 20 horas desenvolvida no marco do Proxecto Piloto de Voluntariado Intercultural impulsado polo GDR-3 Montes e Vales Orientais, en colaboración co Equipo Comarcal de Inclusión Sociolaboral do Corgo e o propio concello.
A iniciativa nace coa finalidade de facilitar a integración das persoas migrantes no territorio, proporcionándolles ferramentas prácticas para mellorar a súa vida diaria e ampliar as súas oportunidades de acceso ao mercado laboral. Nun contexto rural, onde as comunidades son pequenas e as relacións persoais teñen un peso determinante, o coñecemento do idioma resulta clave para comunicarse, atopar emprego e sentirse parte activa da veciñanza.
Ao longo das dez sesións que conformaron a actividade, a aula de Meira converteuse nun espazo de aprendizaxe, apoio e convivencia no que participaron persoas procedentes principalmente de Marrocos e Senegal, colectivos que adoitan atopar maiores dificultades nos procesos de integración social. As clases foron impartidas por Elisa Río Conde, profesora de Lingua Castelá no IES Pedregal de Irimia e voluntaria da Rede de Mulleres do Territorio, quen asumiu por primeira vez o reto de ensinar a persoas adultas.
A docente destacou a experiencia como especialmente enriquecedora tanto a nivel profesional como humano, subliñando a elevada implicación do grupo e o clima de confianza xerado nas sesións. A metodoloxía empregada centrouse nun enfoque eminentemente práctico, combinando explicacións teóricas breves con exercicios aplicados e conversación real, co obxectivo de reforzar a seguridade do alumnado no uso do castelán en situacións cotiás e laborais.
Outro dos aspectos máis valorados da iniciativa foi a posibilidade de conciliación familiar, xa que moitas das participantes, maioritariamente mulleres, puideron asistir acompañadas dos seus fillos, un factor decisivo para garantir a continuidade e a regularidade da asistencia.
Desde o GDR-3 salientan o compromiso, a constancia e a motivación das persoas participantes, para as que este curso supuxo un paso significativo cara a unha maior autonomía e unha mellor integración social. A entrega dos certificados de participación tivo lugar o pasado 5 de decembro e contou coa presenza do tenente de alcalde de Meira, representantes do GDR-3 e profesionais do Equipo Comarcal de Inclusión Sociolaboral, que quixeron recoñecer o esforzo colectivo realizado.
Estas xornadas constitúen un exemplo do valor do voluntariado e da colaboración institucional, así como do potencial das comunidades locais para promover inclusión, igualdade e convivencia. A experiencia abre ademais a porta a futuras accións interculturais, como encontros gastronómicos ou actividades colaborativas, co obxectivo de seguir fortalecendo os lazos comunitarios no territorio.