Meira mantén pechadas as instalacións municipais de ocio e suprime as celebracións anuais
![Captura de pantalla 2020 06 30 a las 16.04.29](https://terrachaxa.com/wp-content/uploads/2020/06/Captura-de-pantalla-2020-06-30-a-las-16.04.29.png)
O Concello de Meira vén de facer público un decreto no que declara a suspensión de varios eventos previstos para este verán "tendo en conta a situación sanitaria actual".
Deste xeito, este ano non haberá carreira popular, festa da malla, comida anual de maiores e a xira, todos eles eventos que tiñan que celebrarse nos meses de xullo e agosto. Do mesmo xeito, afirma que non promoverá as festas populares.
Así mesmo, o Concello decidiu manter pechadas as diferentes instalacións públicas municipais, como o campo de fútbol, a piscina, o parque infantil, o parque biosaudable e o pavillón polideportivo.
O Concello lembra no decreto que "a saúde é o primeiro e desde este Concello entendemos que é un aspecto da xestión que queremos garanteir e coidar, polo que rogamos a utilización de máscaras e que garden as distancias de seguridade".
Como explica o Concelleiro de Cultura, Agustín Méndez, esta decisión foi tomada "pola dificultade que supón poder facer fronte a todos os medios persoais e materiais necesarios para garantir as medidas hixiénico-sanitarias.
Por outra banda, membros da organización das festas indicaron que este ano non haberá festas patronais debido á situación e a dificultade que expresa o mesmo decreto para manter a seguridade sanitaria. Así mesmo, non haberá carreira de carrilanas.
Pola súa banda, a oficina de turismo de Meira fe de facer público o seu horario de verán que cambia mañá día 1 de xullo. Estará aberta de martes a sábado de 10.00 a 13.30h e de 16.30 a 19.00h. e os domingos e festivos de 10.00 a 13.30h. pechando igualmente os luns (salvo festivo ou véspera de festivo).
Pola súa banda, a igrexa recupera as súas visitas guiadas que serán de martes a sábado ás 11.0, 12.30. 17.00 e 18.00 horas. Os domingos terán o mesmo horario só de mañá e os festivos serán ás 11.00 e ás 12.00 horas.
As visitas durarán 45 minutos.