Meira trasladou para hoxe a queima dos mecos do Antroido por mor do temporal
O Concello de Meira viuse na obriga de modificar a programación do Antroido 2026 debido ás condicións meteorolóxicas adversas provocadas polo temporal Pedro. A organización decidiu aprazar a tradicional queima dos mecos, que finalmente terá lugar hoxe, venres, a partir das 19.00 horas na Campa do Plantío.
Segundo informan desde a organización, durante as xornadas do xoves e do venres pola mañá procedeuse á recollida dos mecos, unha tarefa realizada a petición veciñal.
A decisión responde á necesidade de garantir a seguridade no desenvolvemento dunha das citas máis emblemáticas do Entroido meirego. A actividade está organizada de maneira conxunta polo Concello e as asociacións locais, que manteñen así a celebración da queima como acto central destas festas populares, adaptando o seu calendario ás circunstancias climatolóxicas.