Mestura de Nete recada máis de catro mil euros no festival solidario para Alucem
![festival-solidario-mestura-de-nete](https://terrachaxa.com/wp-content/uploads/2024/05/festival-solidario-mestura-de-nete.jpg)
O festival solidario que Mestura de Nete celebra todos os anos recadou nesta edición un total de 4.300 euros, que irán destinados a Alucem, Asociación Lucense de Esclerose Múltiple.
Este colectivo cultural celebra todos os anos este festival musical con fines solidarios e en cada ocasión o recadado vai dirixido a unha asociación. Os cartos proceden das practicamente 300 entradas vendidas, algunhas delas en fila 0 e do reparto de rifas.
Segundo confirmou Alucem, cos cartos recadados a asociación ten previsto iniciar un servizo de atención a enfermos de esclerose múltiple ou outras neurodexenerativas afíns na propia vila "para que non teñan que desprazarse ata Lugo".
Polo escenario do auditorio vilalbés desfilaron para o desfrute do público os diferentes grupos musicais do colectivo, procedentes das escolas, ademais do principal.