Miñones presenta en Guitiriz o programa de xestión administrativa para concellos
O delegado do Goberno dá inicio en Guitiriz a este programa que en Galicia favorecerá a 640.000 habitantes de pequenos concellos. Persoal das subdelegacións do Goberno desprazaranse aos concellos da iniciativa para informar á cidadanía dos trámites que poden realizar desde o domicilio e ensinarlles a facer estas xestións de forma dixital.
O delegado do Goberno en Galicia, José Miñones presentou onte en Guitiriz o plan A Administración Preto de Ti, que achegará as ferramentas da administración dixital a 240 concellos de Galicia. O Concello de Guitiriz é a primeira parada desta iniciativa, enmarcada nas políticas de reto demográfico, do Ministerio de Política Territorial en colaboración coa FEMP e que permite avanzar na eliminación da fenda dixital.
“Achegamos a Administración do século XXI aos pobos, poñéndoa directamente ao servizo dos veciños e veciñas, para fortalecer a cohesión social e territorial e reforzar a igualdade de oportunidades”, sinalou o delegado, á vez que destacou que en Galicia beneficiaranse desta iniciativa 640.000 persoas. Na provincia de Lugo, o Plan chegará a 59 concellos; en Ourense, a 81; 33 na provincia de Pontevedra e 67 concellos da provincia da Coruña. Todos de ata 8.000 habitantes.
José Miñones supervisou na Casa Habanera de Guitiriz a primeira sesión deste programa. Fíxoo acompañado pola alcaldesa do Concello, Marisol Morandeira; a subdelegada do Goberno en Lugo, Isabel Rodríguez; e o secretario xeral da Delegación do Goberno, Alberto de la Fuente. Alí agradeceu a colaboración dos concellos “pois este programa non sería posible sen a súa implicación”, e dos funcionarios e funcionarias públicas que percorrerán os pobos nos próximos meses de maneira voluntaria. “Este Goberno traballa para dar ferramentas dixitais á poboación do rural e agora, tamén, para ensinar a aproveitalas nas súas relacións coa administracións”, subliñou o delegado.
Asesorar e xestionar
“Buscamos que buscamos que o Estado estea máis presente no territorio e, en particular, nos municipios menos poboados. Que ninguén senta desprazado á hora de realizar trámites telemáticos e que a cidadanía dispoña da información adecuada para as súas xestións coa Administración”, detallou José Miñones. O Plan seguirá un calendario establecido en cooperación cos concellos.
Cada semana, funcionarios e funcionarias das subdelegacións desprazaranse a estas localidades para ensinar ás persoas interesadas a relacionarse coa Administración de forma dixital, resolver dúbidas e tramitar, entre outros, o certificado dixital da FNMT, imprescindible para moitas xestións e que só se pode tramitar na presenza física da persoa que o solicita. Actualmente, a Administración Xeral do Estado ofrece a posibilidade de realizar de maneira dixital a maior parte das xestións e das comunicacións con seus departamentos.
Desde trámites básicos como as prestacións, o pago de impostos, permisos de condución, abono de taxas públicas, solicitudes de axudas ao estudo ou certificados de vida laboral, ata a solicitude de subvencións, que en moitos casos só pódese xestionar telematicamente. O catálogo de servizos electrónicos da Delegación do Goberno en Galicia ofrece 125 trámites de maneira telemática, entre os que se atopan xestións relacionadas cos servizos de Estranxeiría; pago de taxas; comunicación de mobilizacións; validación de títulos universitarios estranxeiros ou a presentación de queixas ou suxestións ante a Administración.
