Mondoñedo convoca unha nova edición do concurso “Debuxando en Igualdade” polo 8M
O Concello de Mondoñedo, a través do seu Centro de Información á Muller (CIM), vén de lanzar unha nova edición do concurso “Debuxando en Igualdade e contra a violencia de xénero”, unha iniciativa enmarcada na conmemoración do 8 de Marzo que pretende promover a reflexión e a sensibilización entre a mocidade arredor da igualdade real e da erradicación da violencia machista.
O certame está dirixido ao alumnado de Educación Primaria e Secundaria dos centros educativos de Mondoñedo, Abadín, Lourenzá, A Pastoriza, Riotorto e Meira, convidándoos a expresar, a través do debuxo e da ilustración, a súa visión sobre a igualdade entre mulleres e homes e a importancia de construír unha sociedade libre de violencia de xénero.
Cada participante poderá presentar unha única obra, realizada en formato A4 ou A3, empregando técnicas libres de debuxo ou ilustración. O prazo para a entrega dos traballos permanecerá aberto ata o 13 de marzo de 2026, segundo recolle a convocatoria.
Desde o CIM destacan o valor educativo e social deste concurso, que permite traballar a igualdade e o respecto desde idades temperás, fomentando a creatividade como ferramenta para a concienciación. As bases completas do certame poden consultarse nas oficinas municipais e tamén a través das redes sociais do CIM Concello de Mondoñedo.
A actividade conta con financiamento con cargo aos fondos do Pacto de Estado contra a violencia de xénero, reforzando así o compromiso institucional coa prevención, a educación en valores e a igualdade efectiva.