Mostran ao alumnado da USC as oportunidades laborais do polo aeroespacial de Rozas
![visita alumnos usc polo aeroespacial rozas](https://terrachaxa.com/wp-content/uploads/2023/04/visita-alumnos-usc-polo-aeroespacial-rozas.jpg)
A directora da Axencia Galega de Innovación, Patricia Argerey, presentou hoxe o Polo Aeroespacial de Galicia e as oportunidades que ofrece para o desenvolvemento profesional ao alumnado deste Máster, que a Xunta vén apoiando desde a súa posta en marcha no curso 2018-2019, nunha ponencia que tivo lugar no Centro de Investigación Aeroportada de Rozas (CIAR), á que tamén asistiron estudantes do grao de Robótica do campus de Lugo da Universidade de Santiago de Compostela.
A Xunta de Galicia reforza o seu compromiso co Máster en Sistemas Aéreos Non tripulados da Universidade de Santiago de Compostela e da Universidade de Vigo, consolidando así o seu apoio á formación especializada no eido aeronáutico e aeroespacial co obxectivo de impulsar a competitividade do sector en Galicia a través do talento. Este é, xunto coa tecnoloxía, os mercados e a regulación, un dos piares estratéxicos da planificación do Polo Aeroespacial de Galicia 2021-2026. A iniciativa tense consolidado como un dos principais proxectos transxeracionais da Xunta de Galicia e os seus obxectivos a longo prazo están focalizados no emprego do futuro.
A Xunta continuará investindo para atraer e reter o mellor talento de Galicia cara carreiras técnicas e empregos de calidade e alta cualificación, desde as etapas máis temperás ata a Universidade, pasando pola Formación Profesional.
O Máster Universitario en Sistemas Aéreos non Tripulados é un dos dous másteres oficiais ofertados en España sobre Sistemas Aéreos Non Tripulados e o único que inclúe formación básica de piloto de drons. Proporciona un título de alta especialización para estudantes universitarios e inclúe dúas vertentes: unha centrada na enxeñaría de sistemas aéreos non tripulados, que lidera a Universidade de Vigo; e outra enfocada nas súas aplicacións, que lidera a Universidade de Santiago de Compostela.