Muimenta acolle o espectáculo teatral 'Un camiño meteórico' dentro do Circuíto de Teatro Afeccionado 2025
A Casa da Cultura de Muimenta acollerá o vindeiro 20 de decembro unha nova proposta escénica incluída no Circuíto de Teatro Afeccionado 2025. O grupo Os Trocos levará ao escenario a obra Un camiño meteórico, unha montaxe que promete emocionar ao público e ofrecer unha experiencia teatral intensa e chea de sensibilidade.
A función dará comezo ás 19.00 horas e contará con entrada gratuíta, polo que está concibida como unha cita cultural aberta a todos os públicos. A obra convida ás persoas asistentes a deixarse levar pola emoción e a sorprenderse cun relato no que nada é o que parece e no que o inesperado pode caer do ceo en calquera momento.
A representación está organizada pola asociación Xotramu e polo Concello de Cospeito, coa colaboración da Vicepresidencia da Deputación, dentro do seu apoio á promoción do teatro afeccionado e á dinamización cultural do territorio. Desde a organización animan á veciñanza a participar nesta proposta e a desfrutar dunha tarde de teatro en comunidade.