Muimenta acollerá este sábado o I Duatlón Concello de Cospeito con 150 deportistas
A Secretaría Xeral para o Deporte da Xunta de Galicia colabora co I Duatlón Concello de Cospeito, que se celebrará a tarde do sábado 26 de abril en Muimenta coa participación de arredor de 150 deportistas.
A proba, promovida polo Club Triatlón de Vilalba, foi presentada hoxe na Delegación Territorial de Lugo polo delegado territorial, Javier Arias; a presidenta da entidade organizadora, Marta Álvarez; e o alcalde de Cospeito, Armando Castosa, entre outros.
O Duatlón Concello de Cospeito é clasificatorio para o Campionato Galego de Duatlón de Estrada, que se disputará a seguinte fin de semana en Vimianzo. Consta de case 30 quilómetros distribuídos nun primeiro sector de 4,7 quilómetros de carreira a pé polas rúas de Muimenta, un segundo sector de 22 quilómetros en bicicleta ás aforas do núcleo, e o terceiro que retoma 2,5 quilómetros do tramo urbano.
A proba masculina comezará ás 15,30 horas e a feminina ás 17,10 horas. Os organizadores contemplan tamén un circuíto Súper Sprint ou carreira popular que comezará ás 18,45 horas; neste caso só é preciso completar 15,2 quilómetros -a metade de cada sector-.
O punto de saída e de meta estará instalado na rúa Aquilino Iglesias e a entrega de premios está prevista para as 20,00 horas; distribuiranse 1.000 euros entre os gañadores e trofeos para os tres primeiros clasificados das distintas categorías por idade.
O Club Triatlón de Vilalba convoca tamén o sábado pola mañá, a partir das 11,00 horas, o Campionato provincial de duatlón escolar, neste caso no marco do programa Xogade que impulsa a Secretaría Xeral para o Deporte.
Reunirá en torno a 80 rapaces e rapazas procedentes do club anfitrión e doutros cinco da provincia: o Club Cidade de Lugo Fluvial, Polideportivo Lucense, Ría de Foz, Asociación Cultural e Deportiva Xove e Atletismo Guitiriz.
O programa Xogade da Xunta de Galicia recolle 16 modalidades concretas de actividade deportiva escolar ademais das propias das 39 federacións adheridas. O Goberno galego asume o custo do transporte así como os seguros dos participantes, que na provincia rondan os 18.500.