Muimenta proxecta a película 'O Corno' na Igrexa Vella
O vindeiro domingo 17 de novembro, ás 18:30 h, a Igrexa Vella de Muimenta converterase en sala de cine para a proxección da película galega O Corno. Este filme, dirixido por Jaione Camborda, foi merecedor de varios recoñecementos, incluíndo 7 premios Mestre Mateo, a Concha de Ouro á mellor película e o Premio Goya á actriz revelación, Janet Novás, quen protagoniza a historia.
O Corno sitúase na illa de Arousa en 1971 e conta a historia de María, unha mariscadora recoñecida na súa comunidade polo seu apoio ás mulleres en momentos críticos como os partos. A súa vida cambia tras un suceso inesperado, obrigándoa a emprender unha fuxida perigosa pola súa supervivencia, cruzando os camiños do contrabando entre Galicia e Portugal en busca da súa liberdade.
A película, que ten unha duración de 103 minutos, está recomendada para o fomento da igualdade de xénero e non é apta para menores de 12 anos. A entrada será de balde, e este evento, promovido pola Asociación Cultural de Muimenta, representa unha oportunidade única para desfrutar do cinema galego e reflexionar sobre o papel das mulleres e a loita pola liberdade.