Mulleres de Insua convocan un curso de conservación e fermentado de alimentos
A Asociación de Mulleres Rurais San Bartolomeu de Insua organiza os días 13 e 14 de decembro un taller dedicado á conservación e ao fermentado de alimentos, unha actividade pensada para ofrecer coñecementos prácticos sobre técnicas tradicionais e actuais que permiten prolongar a vida útil dos produtos e potenciar os seus beneficios nutricionais. O curso desenvolverase na Casa Escola de Insua en horario de 10:00 a 14:00 horas, nun espazo adaptado para o manexo e preparación dos diferentes materiais.
Esta iniciativa conta con financiamento da Deputación de Lugo, do programa Terras do Miño da Reserva da Biosfera e da UNESCO, entidades que apoian proxectos destinados á posta en valor dos saberes rurais e á promoción de prácticas sostibles. Desde a organización destacan que o taller está dirixido a persoas de todas as idades interesadas en mellorar os seus métodos de conservación doméstica, ao tempo que se fomenta a recuperación de técnicas tradicionais que forman parte da cultura alimentaria da contorna.