Muras acolle unhas xornadas sobre muros tradicionais organizadas por Adega Lugo
Esta fin de semana Adega organiza unhas xornadas no Concello de Muras para dar a coñecer o patrimonio cultural e ambiental galego, sendo os muros en pedra seca elementos característicos das paisaxes cercadas, e pezas de gran importancia na conservación da biodiversidade. As diferentes tipoloxías e materiais, propios de cada zona, conforman a nosa paisaxe e identifica os usos tradicionais do solo, sendo a técnica de construción de pedra seca Patrimonio Cultural Inmaterial da Humanidade segundo a UNESCO.
As actividades distribúense en dúas xornadas matinais. A primeira será o sábado 13 de novembro con saída dende Lugo ás 9.00 horas para comezar o seminario ás 10.30 no Local Social (Rúa Enrique Guzmán, Muras) co título Aproximación ao patrimonio cultural e natural dos valados, na paisaxe da Reserva da Biosfera Terras do Miño.
Participarán Mercedes Máquez, do grupo de investigación da escola galega da paisaxe Fundación Juana de Vega; Ricardo Polín, doutor e investigador dos camiños históricos; Xoán Ramón Vidal Romaní, do Instituto universitario de xeoloxía da UDC, e Ramsés Pérez, de Adega.
Sobre ás 12.00 continuarán cun roteiro interpretativo para remtar cun xantar de convivio no local Social. Regreso a Lugo previsto ás 17.00 horas.
O domingo continuará a formación ás 10.30 con novo obradoiro formativo de reconstrución coa técnica de xunta seca, dun muro situado no Camiño das Ucheiras no Concello de Muras. Estará o artesán José Luis Canteiro que ensinará a preparar e colocar a pedra. Este taller ten prazas limitadas a 20 persoas. Tamén haberá xantar e o regreso previsto á mesma hora.
Haberá servizo de autobuses de balde dende Lugo e petiscos ao rematar as actividades.
As persoas que queiran asistir as xornadas teñen que rexistrarse antes do xoves 11 a través da web de Adega (www.adega.gal).
Estas xornadas están organizadas ao abeiro da Subvención da Reserva da Biosfera Terras do Miño para o desenvolvemento de actuacións de posta en valor do patrimonio natural, cultural e paisaxístico deste territorio na anualidade 2021.
