Muras acolleu unha xornada formativa de agromarketing na Serra do Xistral
Baixo o obxectivo principal de impulsar as actividades tradicionais de montaña vinculadas á conservación dos Hábitats de Interese Comunitario, como motor de desenrolo da bioeconomía rural, o proxecto RURALtXA! impartirá unha serie de formacións co fin de reforzar a competitividade do sector agrogandeiro ligado á conservación da biodiversidade.
RURALtXA! conta co apoio da Fundación Biodiversidad do Ministerio para la Transición Ecológica y el Reto Demográfico (MITECO) no marco do Plan de Recuperación, Transformación y Resiliencia (PTRT) financiado pola Unión Europea - NextGenerationEU. Os seus socios son a Universidade da Coruña e a Universidade de Santiago de Compostela, así como a Fundación Hazi de Euskadi.
Este proxecto centra a súa atención na conservación dos brezais e turbeiras, ambos hábitats de interese comunitario segundo a Directiva Europea de Hábitats, en catro áreas piloto de Galicia: Serra do Xistral e Monte Maior, Serra da Faladouira e Serra da Groba. A continuidade destas prácticas agrogandeiras sostibles é crucial para estes hábitats. Para promover e conservar estas prácticas, creouse unha Rede de Traballo que inclúe aos axentes que desenvolven estas actividades nas áreas piloto de RURALtXA!.
As formacións desenvólvense en base ás necesidades identificadas na Rede. O primeiro dos catro cursos planificados foi unha acción formativa en Agromarketing, celebrada en Muras co apoio do Concello.
A xornada comezou coa benvida do alcalde Manuel Requeijo Arnejo e contou coa participación de expertos en marketing estratéxico, etiquetado e comercialización de produtos agroalimentarios, así como representantes de diversos Consellos Reguladores das IXPs de Galicia. A formación foi dirixida a profesionais do sector interesados en mellorar a comercialización e valorización dos seus produtos no mercado.
A sesión iniciouse coa presentación dos resultados da caracterización das actividades agrogandeiras das CMVMC da Serra do Xistral, no marco de RURALtXA!, a cargo de Jose Á. Penín, técnico do proxecto pola Universidade da Coruña.
A continuación, Xosé Luís Reza, de iuni strategic marketers, abordou as tendencias do mercado e a importancia do packaging como ferramenta estratéxica para mellorar a comercialización dos produtos, incluíndo a marca que RURALtXA! está desenvolvendo en colaboración coas universidades de Coruña e Santiago.
Outro tema clave foi o ecoetiquetado, tratado por Alberto Fraile, investigador predoctoral e membro do equipo do proxecto pola Universidade de Santiago de Compostela, quen tamén presentou as conclusións dos Análises do Ciclo de Vida dos produtos derivados das actividades gandeiras vinculadas á conservación dos Hábitats de Interese Comunitario no ámbito de RURALtXA!.
A xornada rematou cunha sesión informativa sobre as vantaxes e o proceso de adhesión ás Indicacións Xeográficas Protexidas (IXPs). José Gómez, director técnico do Consello Regulador das IXPs Ternera Gallega e Vaca Gallega - Buey Gallego, explicou os beneficios de formar parte destes selos de calidade, así como as condicións para a certificación como ternera galega e ternera suprema, e o rigoroso programa de control da certificación. Por outro lado, Mª Esther Ordóñez, presidenta do Consello Regulador da IXP Mel de Galicia, explicou os requisitos e vantaxes para a incorporación á denominación.
Esta xornada subliñou a importancia da formación en estratexias de marketing para reforzar a competitividade do sector agrogandeiro ligado á conservación da biodiversidade, destacando a necesidade de apostar pola calidade, diferenciación e sostibilidade como elementos clave para o futuro do sector.