Muras celebrará a Festa de Entroido con música en directo e premios para disfraces
O Concello de Muras xa quenta motores para a celebración da Festa de Entroido, que terá lugar na tarde-noite do vindeiro martes 17 de febreiro no Local Social da localidade. A cita desenvolverase entre as 17.00 e as 23.00 horas e promete unha xornada chea de ambiente festivo, música e diversión para todos os públicos.
A programación inclúe música en directo a cargo do dúo Dilema, que animará a celebración ao longo de toda a tarde e noite, así como un concurso de disfraces con premios tanto para participantes individuais como para grupos. En total repartiranse tres premios na categoría individual e tres na modalidade de grupo, co obxectivo de fomentar a creatividade e a participación veciñal nesta cita tradicional do calendario festivo.
Desde o Concello animan á veciñanza a ir preparando os seus disfraces e a sumarse a esta celebración do Entroido, pensada para gozar en comunidade nun ambiente animado e festivo. A Festa de Entroido está organizada polo Concello de Muras coa colaboración da asociación Mulleres Rurais de Muras, reafirmando así o compromiso co mantemento das tradicións e coa dinamización social do municipio.