Muras debate coa veciñanza o luns a posibilidade de crear unha comunidade enerxética
O Concello de Muras organiza unha reunión aberta á veciñanza o luns 21 de outubro, ás 18:00 horas, na Casa do Médico, para tratar a posibilidade de crear unha Comunidade Enerxética no municipio. O encontro contará coa participación do alcalde, Manuel Requeijo Arnejo, e de Xavier Simón, experto da Universidade de Vigo, quen explicará os beneficios deste proxecto e responderá ás dúbidas dos asistentes.
Nesta reunión falarase da situación enerxética do concello, así como de como producir enerxía de forma colectiva, destacando as vantaxes de organizarse para reducir os custos enerxéticos e mellorar a sustentabilidade local. Ademais, abordaranse as formas xurídicas dispoñibles para levar a cabo a produción comunitaria de enerxía.
O evento está enmarcado no proxecto EC4RURAL - LIFE Programme, cofinanciado pola Unión Europea, e conta coa colaboración de entidades como Fegamp e EspazoCoop Unión de Cooperativas Galegas.
Esta iniciativa representa un paso máis na aposta de Muras por un modelo enerxético sostible que fomente a autosuficiencia e a cooperación veciñal en beneficio do rural galego.
Para máis información, pódese contactar a través dos correos info.ec4rural@uvigo.gal ou alcaldia@muras.gal.