O Auditorio Municipal acollerá o Campionato Galego de Culturismo o sábado
O vindeiro sábado, 18 de outubro, o Auditorio Municipal de Vilalba converterase, un ano máis, no epicentro do deporte e da forma física coa celebración do Campionato Galego de Culturismo 2025.
Esta cita, organizada en colaboración coa Federación Galega de Fisicoculturismo e Fitness, celebrarase como vén sendo tradición cada outono, reunindo aos mellores atletas galegos desta disciplina. O evento supón unha das probas máis esperadas do calendario deportivo autonómico, na que se combinan o esforzo, a estética e a superación persoal.
A xornada dará comezo ás 10:00 horas coa pesada dos participantes, un paso imprescindible antes da competición oficial, que comezará ás 12:00 horas. Durante o campionato, o público poderá desfrutar das distintas categorías masculinas e femininas, nas que se valorarán a definición muscular, a simetría e a posta en escena dos deportistas.
O Campionato Galego de Culturismo celébrase cada ano en diferentes municipios da comunidade, e nesta edición Vilalba será novamente o escenario escollido, consolidando a súa traxectoria como sede destacada deste tipo de eventos deportivos.
As entradas xa están dispoñibles a través da páxina web www.entradasvilalba.es, e agárdase unha ampla asistencia de público tanto local como chegado doutras zonas de Galicia.