O Auditorio Municipal Carmen Estévez acollerá en marzo o musical 'Las Guerreras K-Pop'
O Auditorio Municipal Carmen Estévez de Vilalba incorporará á súa programación cultural deste mes o espectáculo familiar e musical Las Guerreras K-Pop, un tributo escénico inspirado nos grupos máis recoñecidos deste xénero musical internacional.
A representación terá lugar o día 25 ás 18:00 horas, nun evento que promete combinar música, danza e posta en escena nun formato de gran impacto visual. As entradas estarán dispoñibles desde 24,20 euros.
O espectáculo preséntase como un musical electrizante no que a fama das súas protagonistas agocha unha guerra sobrenatural polo destino do HofMund. Sobre o escenario, estas “cazadoras” empregan o seu talento musical como escudo místico, despregando coreografías e harmonías co obxectivo de protexer aos seus seguidores dunha inminente invasión demoníaca.
A proposta escénica estrutúrase como unha loita de bandas na que cada canción se converte nunha batalla épica e na que a música actúa como arma definitiva, combinando narrativa fantástica e enerxía K-Pop nun espectáculo dirixido a todos os públicos.