O BNG acusa ao alcalde de adxudicar o bar das piscinas "a dedo"
![visita-obras-piscinas-santa-isabel-outeiro](https://terrachaxa.com/wp-content/uploads/2023/12/visita-obras-piscinas-santa-isabel-outeiro.jpg)
O pasado 5 de xullo, un día antes da Romaría da Santa Isabel, a Alcaldía fixo a concesión para a explotación do bar das piscinas municipais a unha persoa "afín ao alcalde, sen que existira ningún tipo de concurso público nin publicidade previa", tal e como subliña o BNG.
Afirman que este convenio, que se fai en principio pola duración da temporada, vai ser completamente gratuíto, pois o concello non ingresará ningún tipo de remuneración polo bar da piscina que é de toda a veciñanza. "Iso ocorre a pesar dos graves problemas económicos polos que está a atravesar o concello nestes momentos".
"Ademais disto, chama poderosamente a atención que con antelación á sinatura do convenio de explotación, a persoa agraciada xa estivera publicitando nas redes sociais a apertura do citado bar, co logo xa deseñado e tendo xa buscadas as persoas que ían traballar nel durante as festas de Outeiro", engaden.
"Esta é a forma habitual de actuación do alcalde, para o cal os bens públicos pagados por toda a veciñanza están só para o desfrute e beneficio del e dos seus afíns, poñendo sempre por diante o seus intereses particulares sobre o ben común das persoas de Outeiro", din.
BNG esixirá un concurso público
Dende o BNG piden responsabilidades á Alcaldía por esta “cacicada”, esixindo ademais que se convoque un concurso público para que todas as persoas que queiran participar o fagan en igualdade de oportunidades.
“As piscinas custaron moitos cartos que pagamos entre todos e todas e non podemos permitir que se utilicen só para o beneficio do alcalde e do seu círculo de confianza”, continuaron dicindo os representantes do BNG de Outeiro.
"Toda esta situación contrasta coa realidade na que vivimos, que é que rematando o mes de xullo, as persoas de Outeiro non teñen unha piscina á que poder acudir", acusan.
As piscinas foron entregadas ao concello o pasado 31 de maio, "pero dende a Alcaldía non se foi capaz de facer os trámites necesarios para poder abrilas para o seu uso todo o verán".
"O sorprendente da situación é que isto non afectou ás instalacións do bar das propias piscinas, para o cal si se tivo o interese de telo perfectamente rematado e listo para poder inaugurarse para as festas de Outeiro", conclúen.
“Dende o BNG estamos seguros que se na Alcaldía se puxese o mesmo interese en ter listas as piscinas que en que o seu amigo tivera aberto o bar, agora a xente de Outeiro tería un sitio onde poder bañarse os días de calor”, remataron dicindo dende o BNG de Outeiro.